Um Samtök um betri byggð

Samtök um betri byggð voru stofnuð 14. febrúar 1999

Samtök um betri byggð eru óflokksháð samtök sem berjast fyrir mannúðlegu borgarskipulagi í þéttbýli, þar sem sjálfbærni er í fyrirrúmi og tekið er mið af manninum, menningu hans og afkomu.

 
Samtök um betri byggð vill:

• ·Byggja höfuðborgarsvæðið innávið, svo að eðlileg borgargæði verði möguleg.

• Hverfa frá svefnbæjarstefnunni, blanda byggðina atvinnurekstri og búsetu og lágmarka gegnumsreymi  milli vinnu og heimilis.

• Tryggja gangandi og hjólandi fólki aðstöðu til þátttöku í borgarrýminu.

• Samræmda stefnu í byggðarvernd og nýbyggingum.

• Styrkja miðborgarkjarnan með þéttri íbúðarbyggð í baklandi hennar.

 
Samtök um betri byggð vilja snúa frá:

• Sóun í vegakerfi, lagnir, eldsneyti, tíma og landrými.

• Þjáningum í formi félagslegrar einangrunar, álags, hreyfingaleysis, bílslysa og mengunar.

• Rekstri flugvallar í miðborginni.

• Ljótleika og óhagræði sérkennalausrar, útþynntrar bílaborgar.

 

Samtök um betri byggð vilja upplýsa almenning um samspil borgarskipulags og lífsgæða og vekja með áhuga á umhverfismálum í víðu samhengi með því að:
 

• Sýna fram á umhverfisspjöll og þjóðhagslegt óhagræði sem útþynnt bílaborg með mikilli gegnumstreymisumferð hefur í för með sér.

• Sýna fram á áhrif slíks umhverfis á lífsgæði borgarans, heilsu hans félagslíf og fjárhag.

• Sýna fram á gildi almenningsrýmis fyrir mannlíf í þéttbýli og sporna gegn frekari hnignun þess.

• Sýna fram á þá möguleika sem felast í breyttri nýtingu einstakra svæða, t.d. með tilfluttningi Reykjavíkurflugvallar og nýtingu svæðisins fyrir þétta byggð í baklandi miðbæjar.

• Móta og kynna nýjar hugmyndir um þróun borgarsamfélagsins þar sem lögð er áhersla endurnýjun innávið sem valkost við áframhaldandi útþennslu og útþynningu byggðar.

• Skoða möguleika á breyttu kerfi samgönguleiða og stofnbrauta á höfuðborgarsvæðinu, sem leitt getur til skilvirkara höfuðborgarsvæðis og tengingu við miðborg að sunnan og norðan með brúargerð.

Samtök um betri byggð benda á þær hindranir sem koma í veg fyrir að kjörnir fulltrúar íbúa höfuðborgarsvæðisins vinni að hagsmunum borgaranna með því að vekja athygli á:
 

• Afskiptum landbyggðarinnar af borgarþróuninni án tillits til hagsmuna íbúa höfuðborgarsvæðisins.

• Kyrkingartaki flokkanna á starfi kjörinna fulltrúa borgaranna.

• Taki landsbyggðarfulltrúa á flokkssamþykktum um þróun á höfuðborgarsvæðinu í skjóli atkvæðamismunar

• Valdaleysi borgarans um málefni eigin umhverfis.

 

Samtök um betri byggð sýna fram á nauðsyn samvinnu sveitafélaga höfuðborgarsvæðisins um umhverfisvernd og hagræði s.s. með sameiginlegri sýn varðandi
 

• Umferðarkerfi

• Almenningssamgöngur

• Orkusparnað

• Byggingarþörf

• Landrýmissparnað 

 

Samtök um betri byggð setja fram raunhæfar tillögur um samræmingu byggðarverndar og endurnýjunar í eldri bæjarhlutum varðandi:
 

• Stærðarhlutföll og fagurfræði

• Menningargildi

• Skilvirkni

 

Samtök um betri byggð kalla eftir framtíðarsýn kjörinna fulltrúa svæðisins um skýra valkosti í skipulagsmálum.